افضل مكان لتركيب التكييف وتجنب مشاكل المكان الخطأ
لو انت هتشترى تكييف او اشتريت تكييف وخلاص هتركب التكييف قريب فالمقال ده مهم ليك ولو مش بتحب التفاصيل الكتير ممكن تنزل اخر المقال وهتلاقى الخلاصه
ايه المشاكل اللى ممكن تحصل لو مكان التكييف غلط ؟
وايه افضل مكان ممكن تركب فيه التكييف ؟
وازاى اقدر استفاد من التكييف اكبر استفاده لما اختار مكان التكييف صح؟
المقال دا هيجاوبك على الأسئلة دى فلو مهتم …. يلا نقول حلول علميه بالعامية
هنعتبر يا سيد النهارده يوم تركيب التكييف وانت مفضى نفسك وواخد يوم اجازه مخصوص عشان فنى التكييف جاى النهارده أخيرا بعد ثلاث مواعيد اخدتهم قبل كدا من شركه التكييف
اول حاجه هتعملها هتسمع من الفني … اسأل اهل العلم يا سيد … خليه يقترح عليك اكتر من مكان ممكن يركب فيه التكييف فلو ربنا كرمك بفنى بيراعى ربنا هيقلك كل الحلول الممكنه وأماكن التركيب المتاحه كلها مش السهلة في التركيب بس … وبعد ما تسمعه كويس نحكم عقلنا قبل ما نختار مكان معين وناخد بالنا من اللى هقوله دلوقتى
نسيت اقولك يا سيد زى ما انت عارف ان الجهاز عباره عن وحدتين وحده داخلية بتركب في الغرفه ووحده خارجيه بتركب خارج الغرفة..
هنتكلم الأول عن الوحده الخارجيه
– لازم المكان يكون واسع ( يعنى لما تركب الجهاز مفيش حاجه تعوق الهواء اللى خارج من الجهاز زى حيطه جار او يكون منور صغير او ان المكان مغلق في الأساس مش مفتوح)
– لازم يركب في مكان سهل الوصول ليه في التركيب او لو هتفك الجهاز تانى او هتعمل صيانه للجهاز ( وخلى بالك عشان دا بيفرق في ضمان الجهاز )
– حاول تختار مكان يكون مش بيتعرض لأشعه الشمس كتير او للأتربه ويا سلام لو تقدر تعمل تانده ( الجهاز هيدعيلك وانت هتاخد منه كفائه اكبر وافضل وبالتالي اوفر )
– المكان يكون قريب من الوحده الداخليه ( هتاخد كفائة كامله ومش هيحصل هدر بسبب طول المواسير واوفرلك لان اغلب الأجهزة بيبقى معاها 3 متر مواسير فريون بس والباقى هتشتريه وصدقنى سعر المتر مش هيعجبك )
نختار مكان يخلى وصلات المواسير اللى بين الوحده الدخلية والخارجيه تكون مساراتها مستقيمة ونقلل التكويع قدر المستطاع عشان كفائة الجهاز
لو هتركب اكتر من جهاز في نفس المكان خلى في مسافات مناسبه بين كل جهاز وجهاز ( يعنى لو هيركبوا جنب بعض سيب مسافه للصيانه مناسبه ولو الجهازين في مواجهة بعض يبقى لازم تكون مسافه كبيره ومناسبه عشان ميتأثرش الجهاز بالهواء الساخن اللى خارج من الجهاز التانى … وتقدر تعرف المسافات دى طبقا لنوع الجهاز والقدره من كتيب هيكون جاى مع الجهاز كدليل للتركيب هتلاقى مكتوب المسافات بالظبط على حسب مكان كل جهاز من التانى )
- من الحجات المهمه اللى لازم تاخد بالك منها الحيطه اللى هيركب عليها حامل التكييف لازم تكون قويه وتقدر تتحمل وتشيل الجهاز
- ولو تحت بيتك مطعم او محل ممكن يكون بتتعامل مع زيوت او فحم الأفضل تركب الوحده في مكان تانى عشان هتحتاج بأستمرار فنى يعملك صيانه وتنظيف للجهاز .
- تانى حاجه يا سيد الوحده الداخلية
- لازم المكان اللى هتركب فيه يبقى مفيش اى عائق يمنع الهواء زى ستاره جزء من الخرسانه نازل او اعمال ديكور او نجفه مثلا قريبه منه
- لازم المكان يكون قريب من مكان صرف عشان المياه اللى بتبقى نازله من التكييف والأفضل نجهز صرف من الأول عشان منبهدلش غسيل الناس اللى لسه منشور
- وكمان المكان يبقى قريب من مصدر كهربا عشان منبهدلش الدنيا لو المكان متشطب والأفضل نجهز من الأول مصدر الكهربا المناسب ( وبالمناسبه لو بتشطب لسه في الشقه فمصدر الكهربا ممكن يكون قريب من الوحده الداخلية او الخارجيه حسب الماركه لأن ف اختلاف فى مكان توصيل الكهربا بين المركات المختلفه وبعض القدرات .. والأفضل تقول للفنى انت وبتجهز للتكييف )
- حاول تخلى مستوى الوحدة الداخلية قريب من الوحدة الخارجية
- المكان يبقى بعيد عن اى مصدر حراره او غازات او ابخره بها زيت في البيت
- – اتأكد ان الحائط هيتحمل الجهاز
- لو الغرفه على شكل مستطيل فالافضل تركب في الضلع الكبير عشان تضمن توزيع افضل للهواء
- لو المكان هيركب فيه جهازين والغرفه على شكل مستطيل الأفضل ان التركيب يكون على نفس الحائط مش الجهازين متقابلين ونقسم الجهازين نضم توزيع هواء بطول الغرفه
- اختار مكان بعيد عن السلم او شباك او باب يتسبب في تسريب الهواء
- ابعد الجهاز عن مكان التلفزيون لأن ممكن يحصل تسريب مياه وتبوظ التلفزيون
- وابعد عن التركيب فوق السرير عشان الصوت هيبقى واضح بالليل قبل ما تنام وعشان لو هتعمل صيانه متبهدلش السرير
وفي النهاية يا سيد لازم تفكر كويس قبل ما تركب التكييف في مكان مش مناسب عشان تحافظ عل الجهاز وتقدر تستفاد اكبر استفاده وتوفر تكلفه في التركيب او التشغيل
الخلاصة
احتياطات تركيب الوحده الخارجية
- – مكان واسع ولا يوجد عائق امام الجهاز وتهويه مناسبه
- المكان يكون سهل الوصول ف التركيب والفك والصيانة
- المكان لا يتعرض لاتربه او دخان او زيوت
- تقليل المسافه بين الوحده الداخلية والخارجية قدر الإمكان
- تجهيز المواسير الواصله بين الوحدتين ف مسار مستقيم قدر الإمكان
- لو هتركب اكتر من جهاز اتأكد ان في مسافه مناسبه بين الجهازين لعمل الصيانه لكل جهاز ومفيش تأثير من الهواء الخارج من الجهاز على الجهاز الاخر
- الحائط اللي هيتم فيه التركيب يكون قادرعلى تحمل الجهاز
احتياطات تركيب الوحده الداخلية
- اختار مكان لا يوجد امامه عائق ( ستاره او خرسانه او نجفه او اى شكل من اشكال الديكور )
- – المكان يكون قريب من مصدر كهرباء ومصدر صرف
- الأفضل ان مستوى الوحده الداخليه قريب او في نفس مستوى الوحدة الخارجية
- المكان يكون بعيد عن اى مصدر حراره او بخار او دخان
- الحائط يكون قادر على تحمل الجهاز
- لو هتركب جهازين في نفس المكان الأفضل الجهازين متجاورين وبينهم مسافه على ان يتم تركيب الجهازين متواجهين
- اختار مكان بعيد عن السلم او الشباك او اى مصدر ممكن يتسرب من خلاله هواء التكييف
الابتعاد عن التركيب فوق السرير او التلفزيون والأجهزة الكهربائية
