حساب قدرة التكييف المناسبه لك ببساطه

عزيزى سيد لو انت قررت تشترى تكييف بسبب فرهده الحر وقررت تدلع نفسك فمن الحجات المهمه اللى لازم تحددها قبل ما تبدأ تدور وتسأل على الأسعار انك تعرف انت محتاج قدره تكييق كام حصان على حسب المساحه اللى هيركب فيها التكييف وانا هقلك تعمل دا ببساطه فلو مش بتحب الرغى الكتير فبسرعه انزل اخر المقال هتلاقى الخلاصه او ممكن تستنى عشان هقلك … حلول علميه بالعامية

من الحجات المهمه اللى هتوفرلك فلوس كتير لو انت رايح تشترى تكييف ان التكييف يكون مناسب للمساحه ومكان الغرفه يعنى الغرفه بتبص عل جار ولا مباشر للشمس ولا دور أخير وحجات تانيه هتأثر عل حسابنا للقدره المناسبه للغرفه . ودا عشان توفر من استهلاك الكهرباء وفى نفس الوقت ميتنصبش عليك وتشترى حاجه اكبر من اللى ممكن تكون انت محتاجه ففي كل الحالات هتوفر هتوفر لو حسبتها صح.

دلوتى هقلك ببساطة الطريقه الل هنحسب بيها القدره

ببساطه  عن طريق قياس مساحه الغرفة  اول  حاجه هتعملها هتقيس طول الغرفه وبعد كدا هتقيس العرض وتضرب قيمه الاتنين ف بعض والناتج اللى هيطلعلك من اصل ضرب الطول في العرض دا هيبقى المساحه فتقسم المساحه دى عل 8 هيطلعلك رقم … الرقم دا هو قدرة التكييف الل انت هتحتاجه بالحصان .

يعنى لو انت عندك غرفه طولها 4 متر طولى وعرضها 3 متر طولى  هتضرب 4 في 3 هيطلعلك الناتج 12 متر مربع هتقسم الناتج دا (12) عل القيمه الثابته 8 هيطلعلك النتيجه 1.5 وبكدا يبقى انت محتاج قدره الجهاز في الغرفة دى 1.5 حصان ..

طب خلينا ندى مثال تانىى لو انا عندى غرفه طولها 5 وعرضها 4.5  هنضر 5*4.5 وهتطلعلنا النتيجه 22.5 ودى مساحه الغرفه زى ما قلنا فهنقسم الرقم دا على 8 هيطلعلنا الناتج 2.8  والناتج دا جاى بين قدره الجهاز 2.25 والجهاز 3 حصان فالافضل هنا نختار القدرة الأعلى واللى هي 3 حصان

طب يا سيد لو عندك غرفه ارتفاعها عالى وعايز تحسبها  او اى غرفه عايز تحسبها طبقا لحجم الغرفه عشان توصل لقيمه دقيقه اكتر ممكن تحسبها ازاى ببساطه يا صديقى هنحتاج نعرف طول وعرض الغرفه وكمان الارتفاع وهنستخدم المعادله دى  ( الطول * العرض * الارتفاع ) ودا اسمه الحجم يعنى انت دلوقتى جبت حجم الغرفه

الخطوه اللى بعدها هتضرب الناتج دا (حجم الغرفه ) في 300 والناتج اللى هيطلعلك هتقسمه على 12000 والناتج اللى هيطلع دا هو عباره عن القدره اللى انت محتاجها لكن بوحده قياس اسمها الطن التبريدى وعشان تحولها لقيمه بالحصان هتضرب  الناتج النهائي فى 1.5 والقيمه اللى هتظهرلك هي دى قدره التكييف اللى انت محتاجه يركب  في المكان .

خلينا نعمل مثال مع بعض  لو عندك غرفه والغرفه  دى طولها 6متر  وعرضها 4.5 متر والارتفاع 3 متر هنحسب الأول حجم الغرفه هنقول  6*4.5*3 هيطلع الناتج  81 متر مكعب ودا كدا حجم الغرفه … هنضرب حجم الغرفه اللى هو 81 متر مكعب  في 300 هيطلعلك الناتج 24300 هنقسم الناتج دا على 12000 عشان نوصل لقدره التكييف بالطن التبريدى واللى هتبقى في الحاله دى  2 طن تبريد وعشان نعرف قيمه قدره التكييف بالحصان هنضرب قيمه الطن في 1.5 واللى هيطلعلك 3 حصان في الحاله اللى احنا بنحسبها دلوقتى .

طب هلى انت كدا خلاص تقدر تعرف قدره التكييف  المناسبه لأى غرفه عندك ؟ اه تقدر بس خلى بالك يا صديقى في عوامل تانيه مهمه لازم تحطها في حساباتك انت وبتحسب زى ما علمتك ان الحسابات دى تقريبيه وان في عوامل تانيه ممكن تأثر تخليك تزود القدره عن الحسابات اللى اتعلمناها مع بعض … زى طبيعه المكان ( يعنى لو غرفه نوم مش زى لو غرفه اجتماعات او غرفه مطبخ او غرفه فيها احمال حراريه زى اجهزه بتطلع حراره او فصل دراسى في عدد كبير من الاشخاص … في الحاله دى هتحتاج تزود شويه عن القيمه اللى هتطلعلك من الحسابات اللى عملناها )

وكمان لو المكان بيتعرض للشمس من اكتر من اتجاه لفترات طويله خلال اليوم او في أجزاء كتير من الحائط عباره عن زجاج.

او لو الغرفه دى في الدور الأخير والسطح مش معزول في الحاله دى من الضرورى تكون قدره الجهاز اكبر من القدره اللى هتطلعلك في الحسابات … وفى الاخر اسأل اهل العلم يا سيد واللى احنا بنحاول نوصلهولك هو مجرد تسهيل للمعلومه وتثقيف مؤقت لحين الوصول لأهل الخبره

الخلاصة

: حساب قدرة التكييف  المطلوبه لغرفه ما

الطول بالمتر * العرض بالمتر * الارتفاع بالمتر *300

5 x 4 x 3 x 300 = 18000 BTU

ثانياً: نحوول القيمة إلى طن التبريد

18000 / 12000 = 1.5

وعشان نوصل للقيمه بالحصان هنضرب الناتج في 1.5

1.5*1.5=2.25 وبكدا قيمه القدره  للتكييف للغرفه 2.25 حصان